Hy sal jou uit ses benoudhede verlos; in sewe sal geen onheil jou raak nie. Job 5:19
Twis is 'n sterk en voortdurende konflik oor 'n fundamentele kwessie. Twis is dieper as ʼn argument, wyer as onenigheid. Twis behels gewoonlik bitterheid en soms geweld. Ons sien vandag dikwels twis op die politieke terrein, aangesien kandidate vir hul amp aanvalle teen hul politieke vyande loods. Twis binne gesinne kan lewenslange emosionele letsels tot gevolg hê. Twis tussen nasies kan lei tot oorlog. Wanneer twis onder gelowiges voorkom, word die kerk se getuienis beswadder en word Christus oneer aangedoen.
Die Bybel waarsku teen twis en verwerp diegene wat dit veroorsaak: “Dit is tot eer om twis te vermy, maar elke dwaas is vinnig om te stry” (Spreuke 20:3; lees ook Spreuke 18:6 en 22:10). Maar om twis te vermy is moeilik; selfs in die Nuwe Testamentiese tyd het twis in die vroeë kerk opgeduik (1 Korinthiërs 3:3; 1 Timoteus 6:4; 2 Korintiërs 12:20). Die oorsaak van twis is onderliggende sonde: “Wat veroorsaak die rusies en gevegte onder julle? Kom hulle nie van die bose begeertes in oorlog binne jou nie?” (Jakobus 4:1, NLT).
Twis kan ontwikkel wanneer 'n meningsverskil die prioriteit in 'n verhouding word. Twis gaan altyd gepaard met trots en 'n onleerbare gees by een of albei partye. Spreuke 13:10 sê: “Waar twis is, is trots, maar wysheid word gevind by dié wat raad aanneem.” Wanneer iemand weier om 'n ander standpunt te oorweeg en sy eie manier te eis, ontstaan twis. Iemand wat op twis staatmaak sal nie kompromie, onderhandeling of nederigheid toelaat nie. Twis vervreem vriende, verdeel gesinne en vernietig kerke.
Die veewagters van Abram en Lot het met mekaar gestry (Genesis 13). Isak het twis van die inwoners van Gerar oor drinkwater in die gesig gestaar (Genesis 26). Twis onder die Israeliete het gelei tot Korag se opstand (Numeri 16) en tot die Israeliete se wens om in die woestyn te sterf (Numeri 20). Sulke twis lei altyd tot moeilikheid en vereis die wysheid van godvrugtige vredemakers om te besweer.
God haat twis in Sy kerk om verskeie redes:
1. Tweestryd en twis vernietig eenheid. Eenheid gebaseer op die waarheid van God is so belangrik vir Jesus dat, in Sy langste opgetekende gebed, Hy het die Vader gevra dat Sy volgelinge “ een sou wees soos ek en jy een” is (Johannes 17:22). Enigiets wat daardie eenheid verpletter, is 'n vyand van die kerk en 'n vyand van God.
2. Twis is die teenoorgestelde van liefde. Eerste Korintiërs 13:1–3 herinner ons daaraan dat niks wat ons as Christene doen so noodsaaklik is vir ons geloof soos liefde nie. Om “reg” te wees, ons weergawe van “waarheid” te verklaar, of dosyne goeie, selfopofferende dade te doen, tel vir niks sonder liefde nie. Liefde sal nie twis duld nie, en twis kan nie bestaan waar liefde heers nie.
Wanneer ons onsself toelaat om in twis gewikkel te raak, het ons “Nee” gesê vir liefde!
Verkorte vrye vertaling van die artikel in Got Questions: Strife - deur Nita Kearney
Yorumlar